ମୁଁ ମଲା ମାନବିକତା କହୁଛି

Credit: Google

ମୁଁ ମଲା ମାନବିକତା କହୁଛି " ମୁଁ ଅନ୍ଧ ମୂକ ସାକ୍ଷୀ ,

ମଣିଷ ନିଜେ ନର୍କ ଭିତରକୁ ଚାଲିଆସିଛି । ମୋ ହତ୍ୟା ପାଇଁ କେବଳ ଓ କେବଳ ଏଇ ମଣିଷ ଚେଷ୍ଟା କରିଚାଲିଥିଲା। ଶେଷରେ ଶ୍ବାସରୁଦ୍ଧ ହେଇ ମୋର ମୃତ୍ୟୁ ହେଇଛି । "

ଶହ ଶହ ଗାଡିମଟରର ଶବ୍ଦ କୋଳାହଳ ଭିତରେ ମଣିଷ ବେଶୀ ହତାଶ ହୋଇପଡ଼ିଛି । ତା କାନ୍ଦ ର ଶବ୍ଦ ଆଜି କାହାରିକୁ ଶୁଭୁନି । ଶୁଭୁନି କି କାହାର ଶୁଣିବାକୁ ବୁଝିବାକୁ ସମୟ ବି ନାହିଁ । ବ୍ୟସ୍ତତା ଭିତରେ ବୟସ ବି ଭୁଲିଗଲାଣି କହିଲେ ଚଳେ । ମଙ୍ଗଳ ଗ୍ରହ ର ରାସ୍ତା ସାଉଣ୍ଟି ଗାଁ ରାସ୍ତାକୁ ଭୁଲିଗଲାଣି । ଏତେ ବଡ ବଡ ଅଟାଳିକା ଆଜି ମଣିଷକୁ ତା ସତ୍ୟତା କୁ ଲୁଚେଇ ରଖିବାକୁ ବାଧ୍ୟ କରୁଛି । ନିଜ ମନ ଖୁସିରେ ତା ମନକଥା କହିବାକୁ ତା ଭିତରେ ସାହାସ ସୁଦ୍ଧା ନାହିଁ କିନ୍ତୁ ମଣିଷ ଏବେ ନିଜକୁ ସର୍ବଶକ୍ତିମାନ ସର୍ବଶ୍ରେଷ୍ଠ ଭଗବାନ୍ ମଣି ପୃଥିବୀରେ ଶାସନ କରିବା ଆରମ୍ଭ କରିସାରିଲାଣି । ସପ୍ନର ସୌଦାଗର ମଣିଷ ଏବେ ନିଜ ସପ୍ନରେ ଟଙ୍କା ଟଙ୍କା ବୋଲି ରଡି କରୁଛି । ନଅ ମାସ ର କଷ୍ଟ ବଦଳରେ ଦୁଇ ଚାରି ପଦ ବିଦେଶୀ କଥା କହି ମା କୁ ଅନ୍ୟ ବୁଢାବୁଢୀ ଙ୍କ ସହିତ ବଞ୍ଚିବା ଶିଖେଇଦେଇଛି । ନନା ବୋଉ ଡାକ ବଦଳରେ କେଇଟା ଅଖାଡୁଆ ଶବ୍ଦରେ ଅଭ୍ୟସ୍ତ ନହେଲେ ଗାଁ ରେ ଛାଡିଦେଇ ଆସିବାର ଧମକ ବୈଶାଖ ଖରା ଠୁ ବେଶୀ ବାଧିବାକୁ ଆରମ୍ଭ କରିସାରିଲାଣି ।

 ବୋଉ ର ଶହେ ପଦ ଗାଳି ନନା ଙ୍କର ରାଗୀ ଆଖି ଠାରୁ ଏବେ ବିଦେଶରେ ବି ବିଦେଶୀ ଶୁଣି ଲାଙ୍ଗୁଡ ଯାକି ମଲା ଭଳି ବଞ୍ଚିବାକୁ ଚାହୁଁଛି । ପଖାଳ କଂସା ସାଙ୍ଗରେ ଛଅ ତିଅଣ ନଅ ଭଜା ରେ ତିଆରି ଏଇ ଦେହ ଆଜିକାଲି ମୁଠାକ ବିରିୟାନୀ କୁ ଶହ ଶହ ଟଙ୍କା ରେ କିଣି ଆଣି ନିଜକୁ ଧନୀ ଧନୀ କହି ଚିତ୍କାର କରୁଛି । ସମାଜ ସାମାଜିକ ମଣିଷ ଏଇ ବିଦେଶୀ ସାମ୍ରାଜ୍ୟ ପାଇଁ ଅଣନିଶ୍ବାସୀ ହେଇ ଖଟି ଚାଲିଛି । ଭାଇ ଭଉଣୀ ଘର ପରିବାର ର ଭାର ବଦଳରେ ସ୍ତ୍ରୀ ର ଖର୍ଚ ହାଲୁକା ଲାଗିଲାଣି । ସ୍ଵପ୍ନ ପାଇଁ ଆଉ ଜଣଙ୍କୁ ଗାତକୁ ଠେଲି ଦେଇ ନିଜେ ପହଞ୍ଚିଲା ପରେ ଗୀତା କୋରାନ୍ ର ଘୋଷା ପଦ ସବୁ ଗାଇଦେଇ ପ୍ରଶଂସା ସାଉଣ୍ଟୁଛି। ପଇସା ଦେଇ କିଣା ହେଇଥିବା ଗୋଟେ ଆରମ୍ଭର ଶେଷ ଖୋଜି ଖୋଜି ମଣିଷ ଏବେ ଥକା ମାରି ବସିଯାଇଛି। ଧନ ସମ୍ପତ୍ତି ପୁଅ ବୋହୁ ଲୋଭରେ ମୂକ ମଣିଷ ଏବେ ମୂର୍ଚ୍ଛା ହୋଇଯାଇଛି ।

କାହା ପାଖେ ବା ସମୟ ଅଛି , କିଏ ଆସିବ ଟିକେ ଆଉଁସି ଦବାକୁ ?

ଆପଣଙ୍କ ବ୍ୟସ୍ତ ସମୟରୁ ସମୟ ପାଇଁ ଧନ୍ୟବାଦ ।