କିନ୍ତୁ ମୁଁ କିଛି କ୍ଷଣ ଆଉ ବଞ୍ଚିବାକୁ ଚାହେଁ

Credit: Unsplash

ମୁଁ ହଜି ଯିବାକୁ ଚାହେଁ , 

ବେଳାଭୂମି ର ଅମାପ ନୀଳ ସାଗର ଗର୍ଭରେ ତରଙ୍ଗାୟିତ ଢେଉ ରେ 

ଅସ୍ତଗାମୀ ସୂର୍ଯ୍ୟ ର ବିଞ୍ଚାଡ଼ି ହୋଇ ପଡ଼ୁଥିବା କିରଣ ପରି , 

ଶେଷ ଶ୍ରାବଣ ର ଶେଷ କେଇ ବୁନ୍ଦା ବର୍ଷା ପରି , 

ଯୁଦ୍ଧ ରେ ଜିତିବାର ଗୌରବ ପରି ,

ପ୍ରଥମ ସ୍ପର୍ଶ ରେ ସରିଯାଉଥିବା ଲାଜ ପରି , 

ମୁଁ ଭାଙ୍ଗିଯିବା କୁ ଚାହେଁ , 

ବସନ୍ତ ଋତୁ ର ପତ୍ରଝଡ଼ା ପରି , 

ପବନ ରେ ଦୋହଲୁଥିବା ବାଇ ଚଢ଼େଇ ବସା ଟି ପରି ,

ଘଣ୍ଟ ଶଙ୍ଖ ନାଦରେ ନୃତାୟମାନ ମନ ର ଆଳତୀ ଶେଷରେ ନୀରବତା ପରି , 

ପ୍ରେୟସୀ ବିନା ଶକ୍ତ ହୃଦୟ ର ଦୁର୍ବଳତା ପରି ,

ପ୍ରଥମ ଦେଖା ରେ ମନଗଢା ଦୁଇ ଧାଡ଼ି ଗପ ଟିଏ ପରି ,

ମୁଁ ଲୁଚି ରହିବାକୁ ଚାହେଁ ,

ଶୀତ ସକାଳ ର ମେଘ ମାଳ ରେ ଲୁଚକାଳି ଖେଳୁଥିବା ଖରା ତାତି ପରି , 

ପ୍ରେମିକ ହୃଦୟରେ ପ୍ରଥମ ପ୍ରେମିକାର ମନଖୋଲା ହସ ର ବାସ୍ନା ପରି , 

ଏକାକୀ ମନ ର ଜହ୍ନ ତାରା ସହ ସମ୍ପର୍କ ପରି ,

ସମୟକୁ ବଶ କରି ରଖିଥିବା ତୁମ ଛାତି ର ଉଷ୍ମତା ପରି , 

ଭୋର ସକାଳ ରେ କପେ ଚା ରେ ଟିକେ ଅଧିକ ଚିନି ପରି , 

ଜହ୍ନ ରେ ଥିବା କଳଙ୍କ ଟିକକ ପରି , 

କିନ୍ତୁ ମୁଁ କିଛି କ୍ଷଣ ଆଉ ବଞ୍ଚିବାକୁ ଚାହେଁ ,

ପଲିଥିନ ଜରି ରେ ଲାଗିରହିଥିବା ଶେଷ ବର୍ଷା ବିନ୍ଦୁ ପରି , 

ପଦ୍ମ ପତ୍ର ରେ ଦୋଳାୟମାନ କାକର ଥୋପା ପରି ,

ବିସର୍ଜନ ରେ ଶେଷ ମନ୍ତ୍ର ବେଳେ ଆଖିରେ ଜକେଇ ଆସୁଥିବା ଲୁହ ପରି , 

ଅଧା ଦେଖା ସ୍ଵପ୍ନକୁ ବାରମ୍ବାର ଅନୁମାନ କରୁଥିବା ଭାବନା ପରି ,

ଅନୁମତି ର ଅପେକ୍ଷା ରେ ଛାତି ର ବଢୁଥିବା ସ୍ପନ୍ଦନ ପରି , 

ଶେଷ ନିଶ୍ୱାସ କ୍ଷୀଣ ହେବା ବେଳେ ଆଉ କିଛି ସମୟ ବଞ୍ଚିବା ଆଶା ର ବିଶ୍ୱାସ ପରି ।